ლეიკემიით დაავადებული ბავშვის მამა მევლუდი ჩულუხაძე „იუთუბერ“ გიორგი კალატოზის მიერ გავრცელებულ სკეტჩს მკაცრად აკრიტიკებს და მომხდარს ონკოპაციენტების მშობლების უდიდეს შეურაცხყოფად აფასებს.
მევლუდ ჩულუხაძე პოდკასტერებისგან საჯარო ბოდიშს ითხოვს და მათ დაავადებული ბავშვების მძიმე ყოფით დაინტერესებისკენ მოუწოდებს.
„შეურაცხმყოფელია რა თქმა უნდა მშობლებისათვის და ბავშვებისათვის, რომლებიც გადიან ურთულეს გზას, ამ უსამართლო ბრძოლაში.
მთელი მსოფლიოა გაერთიანებული, მთელი მსოფლიო გაერთიანდა იმისთვის რომ ეს ბავშვები გაამხიარულონ, საჩუქარი აჩუქონ, რაღაცით მოეფერონ გული გაუხარონ და გამოდის ქართველთა ჯგუფი და ამას სასაცილოდ ხდიან - ეს არ შეიძლება.
ეს არის ონკოპაციენტების მშობლების უდიდესი შეურაცხყოფა.
საჯარო ბოდიშს ვითხოვთ ყველა, ონკოპაციენტების მშობლები, რომ ჩვენს შვილებს აუგად იხსენიებენ.
ეს არ არის სასაცილო თემა, დაინტერესდნენ მაინც რა გზას გადის თითოეული ბავშვი, თითოეული ბავშვის თმის ღერის დანახვა ჩვენთვის რა იყო იცით?! საშინელება, ამის აღწერა და თქმა შეუძლებელია ამას ვერ აგიხსნით.. ვერ ავხსნით ამას“, - განაცხადა მევდულ ჩულუხაძემ.
საქმე ეხება იუმორისტულ გადაცემას, სადაც, როგორც ონკოპაციენტების ოჯახის წევრები აცხადებენ, ლეიკემიის მქონე პაციენტების დისკრედიტაცია და მკურნალობის პროცესში ქიმიოთერაპიის გვერდითი ეფექტი სასაცილოდაა წარმოჩენილი. პროექტი TBC ბანკის მიერაა დაფინანსებული.
| სარეკლამო ადგილი - 11 650 x 60 |
