2022 წლის მარტში საქართველოს საგარეო ვაჭრობა, მიუხედავად აქამდე საქართველოს უმსხვილეს სავაჭრო პარტნიორების ათეულში მყოფ რუსეთსა და უკრაინას შორის მიმდინარე ომისა, აგრძელებდა მასშტაბურ ზრდას. ექსპორტი გაიზარდა 26.3%-ით და 411.4 მლნ აშშ დოლარს მიაღწია; იმპორტის მატებამ, შესაბამისად, 15.6% და 895.7 მლნ აშშ დოლარი შეადგინა, - ამის შესახებ Facebook-ზე ექსპერტი სოსო არჩვაძე წერს.

მისივე თქმით, ექსპორტით იმპორტის გადაფარვა 45.9%-ია, რაც წინა, 2021 წლის მარტის მაჩვენებელს (42.4%) 3.5 პუნქტით აღემატება.

„2022 წლის მარტის საქართველოს ექსპორტმა საგრძნობლად გადაუსწრო არა მარტო გასული წლის, არამედ პანდემიამდელი 2019 წლის მაჩვენებელსაც. – ყოველდღიური ექსპორტი 2022 წლის მარტში 2.8 მლნ აშშ დოლარით აღემატებოდა 2019 წლის მარტის ანალოგიურ მაჩვენებელს.

მართალია, 2022 წლის მარტში სავაჭრო დეფიციტი 35 მლნ. აშშ. დოლარით გაიზარდა და 484.3 მლნ აშშ დოლარი შეადგინა, მაგრამ ექსპორტის იმპორტთან მნიშვნელოვანი წინმსწრები ზრდის გამო სავაჭრო დეფიციტის თანაფარდობა სავაჭრო ბრუნვასთან ერთი წლის მანძილზე შემცირდა 3.7 პუნქტით (40.7 პროცენტიდან 37.0 პროცენტამდე).

მოტანილი ინფორმაცია ადასტურებს საქართველოს მზარდ საექსპორტო პოტენციალს, რომელიც განპირობებულია ქართული ბიზნესის მსოფლიო ბაზრებზე წარმატებული ექსპანსიით და სამამულო პროდუქციის კონკურენტუნარიანობით. ექსპორტის ასეთი თვალსაჩინო ზრდა გლობალური არასტაბილურობისა და გაურკვევლობის ფონზე მიღწეულია ხელისუფლების მიზანმიმართული, გაწონასწორებული პოლიტიკით და საფრთხეების არიდების სტრატეგიით. ექსპორტის ზრდაში თავისი წვლილი შეაქვს ქვეყნის სატრანსპორტო-საკომუნიკაციო როლის ზრდასაც, რის პოტენციალის ტრანსფორმაცია პრაქტიკულ შესაძლებლობად მთლიანად ქვეყნის ხელისუფლების ზემოხსენებული პოლიტიკის დამსახურებაა“, - წერს არჩვაძე.