659
07 ივნისი 2022, 17:03
„მოხარული ვარ, რომ ჟურნალისტური ეთიკის ქარტიამ ინგა გრიგოლიას მხრიდან დაადგინა 7-ე პრინციპის (დისკრიმინაცია) დარღვევა. კერძოდ, გადაცემა „რეაქციაში“ 28 აპრილს რესპოდენტი - ექიმი ლევან ფერაძე, გარდა იმისა, რომ იყენებდა დისკრიმინაციულ ტერმინებს: „ღრმა ინვალიდობა“ და „უნარშეზღუდულის სავარძელი“, შეზღუდულ შესაძლებლობას აიგივებდა დიაგნოზთან, ეტლს კი წარმოაჩენდა ნეგატიურ, საშინელ ატრიბუტად, რომლის მოხმარება და დანახვაც ადამიანისთვის დამთრგუნველია. ამ ეპიზოდში დისრკიმინაციული იყო, როგორც ლექსიკა, ასევე, კონტექსტი, რაც შშმ პირთა მიმართ დისკრიმინაციული გარემოს გამძაფრებისა და სტიგმატიზაციის მნიშვნელოვან რისკებს შეიცავდა“, - წერს საპარლამენტო უმრავლესობის წევრი, რატი იონათამიშვილი Facebook-ის გვერდზე.
როგორც ის აღნიშნავს, პრეცედენტების შექმნა ძალიან მნიშვნელოვანია, რათა მედია შშმ პირთა მიმართ სტერეოტიპების გავრცელებას არ უწყობდეს ხელს.
„სამწუხაროდ, გადაცემის წამყვანი, ინგა გრიგოლია არ გაემიჯნა ლევან ფერაძის პოზიციას, რითაც გაემიჯნა შშმ პირთა უფლებებისა და ღირსების პატივისცემას. აღსანიშნავია, რომ ეთიკის ქარტიას უკვე აქვს ნამსჯელი მსგავს საქმეებზე. კერძოდ, თინათინ რევაზაშვილი გიორგი ნიორაძის, ეკა მიშველაძის და ინგა გრიგოლიას წინააღმდეგ საქმეზე საბჭომ აღნიშნა: „სტერეოტიპების გაღრმავების ხელისშემწყობი, შესაძლოა, მარტივად გახდეს მედია, თუკი არ მოეკიდება სიფრთხილით თითოეულ შემთხვევას და არ იფიქრებს გაშუქების კუთხესა თუ ტერმინოლოგიაზე, რომელსაც იყენებს სენსიტიურ საკითხებზე მუშაობისას. მედიასაშუალებები უნდა ცდილობდნენ, ხელი არ შეუწყონ არატოლერანტული, დისკრიმინაციული გარემოს ჩამოყალიბებას“. „მედიას აქვს სოციალური პასუხისმგებლობა, არა მხოლოდ არ გაამძაფროს დისკრიმინაცია, არამედ საზოგადოებაში არსებულ ირაციონალური შიშების და ზიზღის წინააღმდეგ საინფორმაციო ქმედებები განახორციელოს“. „პირდაპირ ეთერში მუშაობისას ჟურნალისტმა უნდა მოუწოდოს რესპონდენტს, თავი შეიკავოს დისკრიმინაციული ენის შემცველი ტერმინების გამოყენებისგან, აღნიშნოს, რომ რედაქციისთვის მიუღებელია დისკრიმინაცია რომელიმე ჯგუფის მიმართ და ემიჯნება რესპონდენტის მოსაზრებებს“. ვფიქრობ, მსგავსი პრეცედენტების შექმნა ძალიან მნიშვნელოვანია, რათა მედია არ უწყობდეს ხელს შშმ პირთა მიმართ სტერეოტიპებით, ცრუ წარმოდგენებით სავსე უარყოფითი და უპატივცემულო დამოკიდებულების ჩამოყალიბებას“, - წერს რატი იონათამიშვილი.
| სარეკლამო ადგილი - 11 650 x 60 |
