პარლამენტის თავდაცვისა და უშიშროების კომიტეტის თავმჯდომარემ, ირაკლი ბერაიამ აშშ-ის თავდაცვის ატაშესთან, ჯოზეფ ბილბოსთან სამუშაო შეხვედრა გამართა, - ამის შესახებ ინფორმაციას პარლამენტის პრესსამსახური ავრცელებს.
მათივე ინფორმაციით, შეხვედრაზე მხარეებმა ორ ქვეყანას შორის თავდაცვისა და უსაფრთხოების სფეროში არსებულ სტრატეგიულ პარტნიორობასა და მისი გაძლიერების მნიშვნელობაზე ისაუბრეს და კომიტეტსა და ატაშეს ოფისს შორის თანამშრომლობის საკითხები განიხილეს.
„ქართულ-ამერიკულ სტრატეგიულ პარტნიორობას განსაკუთრებული მნიშვნელობა ენიჭება ორი ქვეყნის საერთო ღირებულებების დაცვისთვის, ეროვნული ინტერესების გაღრმავებისთვის, ასევე რეგიონისა და მთლიანად ევრო-ატლანტიკური სივრცის უსაფრთხოების განმტკიცებისთვის. აშშ მტკიცედ უჭერს მხარს საქართველოს სუვერენიტეტს და ტერიტორიულ მთლიანობას, ჩვენი ქვეყნის ნატო-სა და ევროკავშირში ინტეგრაციას და მისი თავდაცვისუნარიანობის განმტკიცებას. ორ ქვეყანას შორის სტრატეგიული პარტნიორობის შემდგომი განმტკიცება ჩვენს საერთო ინტერესებშია“, - განაცხადა ირაკლი ბერაიამ შეხვედრის დასრულების შემდეგ.
| სარეკლამო ადგილი - 11 650 x 60 |
