494
01 სექტემბერი 2023, 18:38
"წარმომიდგენია, როგორ სურთ ხელისუფლების დღევანდელ გადაწყვეტილებას "რუსული იმპიჩმენტი" დაარქვან, მაგრამ რუსეთის ავტორიტარული რეჟიმი ამის პრეცედენტს არ იძლევა," - წერს “ხალხის ძალის” წევრი, დავით ქართველიშვილი სოციალურ ქსელში.
მისი განცხადებით, ყოველ ჯერზე, როცა საქართველოს სუვერენიტეტის, კონსტიტუციის, სახელმწიფოებრიობის მოსინჯვა ხდება, ხელისუფლება ამ პროვოკაციებს დამოუკიდებელი სახელმწიფოს პოზიციიდან პასუხობს, რაც აგენტოკრატიული წრეებისთვის გამაღიზიანებელია.
“წარმომიდგენია, როგორ სურთ ხელისუფლების დღევანდელ გადაწყვეტილებას "რუსული იმპიჩმენტი" დაარქვან, მაგრამ რუსეთის ავტორიტარული რეჟიმი ამის პრეცედენტს არ იძლევა. თუმცა რად გინდა, როდესაც ხაზარაძეს აქვს "კრეატიული" ბრენდი: "რუსული ოცნება და მედვედევი" ზურაბიშვილს იმპიჩმენტს უცხადებენ. რად გინდა კონსტიტუცია, როდესაც ქვეყანაში "სამართლიანობის და გამჭვირვალობის" ეტალონად გიგაური და ლომჯარია გყავს.
რად გინდა ზოგადად სუვერენიტეტი, რომელზეც ყოველ ჯერზე ვიღაც მარკეტა გრეგოროვა ან კუბილიუსი თავის პოლიტიკურად აყროლებულ კიდურებს იწმენდენ. რად გინდა დამოუკიდებლობის დაცვა იქ, სადაც "სახელმწიფოებრიობა" სააკაშვილმა მოგვიტანა თურმე, ხოლო "ხალხად" და "საზოგადოებად" ამერიკის ყოფილი ელჩი აქ მხოლოდ IRI-ს და NDI-ს "რესპონდენტებს" თვლის.
ყოველ ჯერზე მიდის ამ ქვეყნის სუვერენიტეტის, კონსტიტუციის, სახელმწიფოებრიობის მოსინჯვა ქმედუნარიანობაზე და ყოველ ჯერზე ეს ხელისუფლება ამ განზრახ შემოგდებულ პროვოცირებას პასუხობს დამოუკუდებელი სახელმწიფოს პოზიციებიდან. აგენტოკრატიულ წრეებში, გინდ ქვეყნის შიგნით, გინდ მის გარეთ, ლაქიებისა და მარიონეტების სამყაროში ეს დაუფარავ გაღიზიანებას იწვევს.
ამოცანა კი კვლავინდებურად მარტივია - ჩვენ ან სამათასწლოვანი სახელმწიფოებრიობის ისტორიის მატარებელი შვილები ვართ, რომლებმაც არაერთ იმპერიას გადავურჩით, ან 247-წლოვანი ისტორიის მქონე ქვეყნის კოლონია და გუბერნია, სადაც საკუთარი აგენტურის ხელისუფლებაში დაბრუნება განუხორციელებელ ამოცანად იქცა. დღეს კი მათ მორიგ "გავლენის აგენტს" მივუჩინეთ თავისი ადგილი და მათ უსაზღვროდ "შეშფოთებულ აღშფოთებასაც" რამენაირად გადავიტანთ.” - წერს დავით ქართველიშვილი.
| სარეკლამო ადგილი - 11 650 x 60 |
