თურმე 169 არასამთავრობო ორგანიზაციამ მოაწერა ხელი კანდიდატის სტატუსის მონიჭების თხოვნის პეტიციას, მაშინ, როცა ზუსტად 25 დღის წინ ისინი საპირისპიროს ითხოვდნენ,- ამის შესახებ სოციალურ ქსელში „ხალხის ძალის“ წევრი, ანალიტიკოსი დავით ქართველიშვილი წერს.

მისი თქმით, არასამთავრობო ორგანიზაციები ცდილობენ საქართველოს მთავრობის ძალისხმევა და მიღწევა მიიწერონ.

„ადრე თუ „ხელნაწერები არ იწვოდა“, ახლა ციფრული მეხსიერების ამოშლაა შეუძლებელი. დღეს თურმე 169 არასამთავრობო ორგანიზაციამ მოაწერა ხელი პეტიციას, რომლითაც ითხოვს ევროკავშირისაგან საქართველოს ამ ორგანიზაციაში გაწევრიანების კანდიდატის სტატუსი მიენიჭოს. დღეს, 2 ნოემბერს ითხოვს. ცინიზმისა და ფარისევლობის პიკია. გავიხსენოთ, რას ითხოვდა EU-სგან იგივე „მესამე სექტორი“ ზუსტად 25 დღის წინ, 2023 წლის 8 ოქტომბერს.

25 დღის წინ საქართველოს არასამთავრობო სექტორმა შეახსენა ევროკავშირს, რომ საქართველომ მის მიერ დადგენილი 12 რეკომენდაციიდან მხოლოდ 3 შეასრულა. „მესამე სექტორმა“ მოითხოვა, რომ სტატუსი საქართველოს არ მიენიჭოს „ციხიდან“ სააკაშვილის გათავისუფლებამდე და რუსეთის წინააღმდეგ სანქციების დაწესებამდე. ასევე, მანამდე არ მიენიჭოს, სანამ „ქართული ოცნება“ არ მოაგვარებს „სისტემურ ანომალიებს“, არ შეამცირებს საარჩევნო ბარიერს 2%-მდე, და არ დაუშვებს წინასაარჩევნო ბლოკების შექმნას.

დღეს გავიდა 25 დღე. „ენჯეომ“ მიიღო ბრიუსელიდან არაორაზროვანი სიგნალი, რომ ევროკავშირმა სწორედ პრემიერ-მინისტრის და „ქართული ოცნების“ ლიდერების ძალისხმევით გადაწყვიტა შარშანდელი უსამართლო გადაწყვეტილების გამოსწორება და არ დაუგდო ყური იმავე არასამთავრობოების ზეწოლას, სტატუსის არმინიჭების თაობაზე. ამიტომ, სასწრაფოდ ცდილობენ „ფირფიტა“ გადააბრუნონ და ამ პროცესის წარმატებული დასასრული, რასაც გაშმაგებულები ებრძოდნენ ბოლო წელიწად-ნახევრის განმავლობაში, საკუთარ „ძალისხმევას“ მიაწერონ“, - წერს დავით ქართველიშვილი.