„მოგეხსნებათ, სოციალურად ჩვენ საკმაოდ რთულად სტრუქტურირებული საზოგადოება გვაქვს. გვყავს საკმაოდ დიდი მოცულობა სოციალურად დაუცველი მოქალაქეებსა და ჩვენ არ შეგვეძლო დაგვეტოვებინა თითოეული ასეთი ჯგუფი ყურადღებისა და სახელმწიფოს მხრიდან ზრუნვის გარეშე და ის ჯგუფები, რომლებიც აქ არის ჩამოთვლილი, ექვსი თვის განმავლობაში 600 ლარის დახმარებას მიიღებენ. რას ნიშნავს ეს – ოჯახები, რომელთა სარეიტინგო ქულა არის 65 ათასსა და 100 ათასს შორის, ეს ნიშნავს იმას, რომ სახელმწიფო უკვე ეხმარება ამ მოქალაქეების ჯგუფს 65 000 ქულამდე, მაგრამ ყურადღების გარეშე არის დატოვებული 65 000-დან 100 000-მდე ქულის მქონე ოჯახები, რომლებსაც ვეხმარებით მრავალშვილიანების და არასრულწლოვნების ყოლის პირობებში, თუმცა ეკონომიკური სიდუხჭირის პირობებში, ჩვენ გადავწყვიტეთ, ასეთ ოჯახებს დავეხმაროთ ექვსი თვის განმავლობაში 600 ლარის ოდენობით და ეს არის საქართველოში 70 000 ოჯახი, რაც არის დაახლოებით 190 ათასი მოქალაქე“, – განაცხადა პრემიერმა.

მისი თქმით, ამასთან ერთად, ოჯახები, რომელთა სარეიტინგო ქულა არის 0-დან 100 000-მდე და ჰყავთ სამი და მეტი 16 წლამდე ასაკის შვილი, რაც ნიშნავს მრავალშვილიან ოჯახებს, ასევე სახელმწიფო დაეხმარება ექვსი თვის განმავლობაში 600 ლარის ოდენობით.

„ასეთი ოჯახების რაოდენობა საქართველოში დღეს არის 21 000 ოჯახი და ეს მოიცავს 130 000 მოქალაქეს.  ეს ძალზედ მნიშვნელოვანი ღონისძიებაა, რამეთუ მოგეხსენებათ, რომ ეკონომიკური გამოწვევებისა და ეკონომიკური კრიზისის პირობებში, მრავალშვილიანი ოჯახები არიან ერთ-ერთი ყველაზე მოწყვლადი ფენა, რომელსაც სახელმწიფოს მხრიდან, რა თქმა უნდა, ყველა შემთხვევაში, სჭირდება ფინანსური დახმარება“, – განაცხადა გიორგი გახარიამ.