383
08 აპრილი 2024, 19:55
პარტია „ხალხის ძალის“ წევრი, ანალიტიკოსი დავით ქართველიშვილი სოციალურ ქსელში ეხმაურება იმ ინფორმაციას, რომ „კონსერვატიულ მოძრაობას“, რომელიც საზოგადოებაში „ალტ-ინფოს“ სახელითაა ცნობილი, საჯარო რეესტრმა რეგისტრაცია გააუქმა.
როგორც დავით ქართველიშვილი წერს, თუ „ალტ-ინფომ“ იმ მარტივი დეტალების გათვალისწინება ვერ მოახერხა, რაც პარტიის დარეგისტრირებას სჭირდება, ქვეყნის მართვაზე პრეტენზია მით უმეტეს არ უნდა ჰქონდეს.
„ხალხის ძალის“ პარტიად დარეგისტრირების დროს ყველა დეტალი გავითვალისწინეთ: დამფუძნებელთა კრება (ყრილობა), დელეგატების სიების შედგენა, წესდების წარდგენა, პოლიტსაბჭოს არჩევა, ლოგოს დამტკიცება, მოწვეული ნოტარიუსი და ა.შ. ერთ-ერთი ყველაზე მარტივი და ხელმისაწვდომი პროცედურაა მთელს მსოფლიოში. არა მგონია, გვატყუებდეს ვინმე, მაგრამ დავიჯერო, „კონსერვატიული მოძრაობის“ გენერალურმა მდივანმა დამფუძნებელ ოქმს ხელი არ მოაწერა, წესდებას მხოლოდ კრების თავმჯდომარემ მოაწერა ხელი, ყრილობის წევრთა სია მათ პირად მონაცემებს არ მოიცავდა, წესდებაში და თანდართულ დოკუმენტაციაში „არაერთგვაროვან“ სახელწოდებებს ჰქონდა ადგილი, პარტიის ლოგოს ესკიზი კანონით გათვალისწინებულ მოთხოვნებს აცდენილი იყო, ხელმძღვანელ ორგანოდ პარტიის ყრილობა არ განისაზღვრა, წესდება პარტიის ქონების გამოყენების წესს არ ითვალისწინებდა და ა.შ.? იმედია, ქართულად, მამა-პაპურად მაინც აღნიშნეს პარტიის დაფუძნება. ჩვენ ესეც ვერ მოვახერხეთ - დიდი მარხვის პირველი დღე იყო. სამაგიეროდ - პარტია ვართ. მოკლედ, მიძნელდება კომენტარის გაკეთება. დაფუძნების სტადიაზე თუ გიჭირს, ქვეყნის მართვის პრეტენზიაზე რაღა მოგახსენოთ“, - წერს დავით ქართველიშვილი.
| სარეკლამო ადგილი - 11 650 x 60 |
