გამჭვირვალობის მოწინააღმდეგეთა მხარდასაჭერად „ფეისბუქზე“ შექმნილ ჯგუფში ძალადობისკენ მოწოდებები ისმის. საუბარია „ფეისბუქზე“ გუშინ შექმნილ ჯგუფზე „დაიტოვე“, რომლის მიზანია იმ ადამიანების ერთმანეთთან დაკავშირება, ვისაც პარლამენტთან მიმდინარე აქციაში მონაწილეობის მისაღებად რეგიონებიდან ჩამოსვლა უნდათ, თუმცა თბილისში ღამის გასათევი არ აქვს.

ჯგუფის ერთ-ერთი წევრი ითხოვს რჩევას, რა წაიღოს აქციაზე თავდაცვის მიზნით გარდა ნიღბისა და სათვალისა, რაზეც პასუხობენ, რომ „ფოცხი, ნამგალი, ურო, ნაჯახი, თოხი და ბარი“. „ნათესავ პოლიციელებს შეუტიეთ ყველამ, იცოდნენ, რომ უსახელო ნაბიჭვრები არიან“, „კრასკით გაბერილი ბუშტები, ეკიპირებას გამოიყვანს წესით მწყობრიდან, მხედველობას წაართმევ რობოკოპს“, „მთელი საქართველოს მასშტაბით საყოველთაო დაუმორჩილებლობის დროა“, - წერენ ჯგუფში.

ჯგუფს უკვე სპონსორიც გამოუჩნდა, ნანუკა ჟორჟოლიანის „ნანუკას ფონდი“. ტელეწამყვანი ნანუკა ჟორჟოლიანი ჯგუფში წერს, რომ ახალი ფონდის გახსნას დღეები სჭირდება, ამიტომ „ნანუკას ფონდის“ ფინანსები, რომლებიც აქამდე ჯანმრთელების პრობლემების მქონე ადამიანებს ეხმარებოდა, ამჯერად იმ ადამიანებს მოხმარდება, რომლებიც ქუჩაში აქციებზე დგანან და არ აქვთ საკვები, ასევე აქციის დროს დაზიანებული ადამიანების მკურნალობას, ღია ცის ქვეშ დარჩენილი ადამიანებისთვის, სასიცოცხლოდ აუცილებელი ნივთების შეძენას.