დასავლელ პარტნიორებს აქვთ ყველაფერი საიმისოდ, რათა უკრაინამ თავისი ხალხი რუსი ტერორისტების თავდასხმებისგან დაიცვას, - ამის შესახებ უკრაინის პრეზიდენტმა, ვოლოდიმირ ზელენსკიმ Facebook-ზე დაწერა.
მისივე თქმით, უკრაინის მოსახლეობის სიცოცხლის დასაცავად ახლა საჭიროა დროული გადაწყვეტილებები საჰაერო თავდაცვის სისტემებთან და იარაღის მიწოდებასთან დაკავშირებით.
„ხარკოვის, ჩერნიგოვის, სუმის, დონეცკის, ზაპოროჟიეს, მიკოლაევის, ხერსონის, ოდესის ოლქები - ტერორისტებმა ერთ კვირაში ჩვენს ქალაქებსა და რეგიონებზე სულ მცირე 380 იერიში მიიტანეს, და ასე ხდება ომის დაწყებიდან ყოველ კვირაში“, - აღნიშნა ზელენსკიმ.
მისივე თქმით, არსებობს საშუალებები ყოველდღიური რუსული ტერორის შესაჩერებლად.
„პარტნიორებს აქვთ ყველა საჭირო სისტემა და შეიარაღება, რათა უკრაინამ სიცოცხლე დაიცვას. მადლობა ყველა ლიდერსა და სახელმწიფოს, რომლებსაც ესმით, რომ მიწოდების ოპერატიულობა და შეთანხმებების სრულად რეალიზება არის ის, რაც იცავს არა მხოლოდ უკრაინელებს, არამედ ყველა ერს, რომლის წინააღმდეგაც შეიძლება იყოს მიმართული რუსული ტერორი“, - წერს ზელენსკი.
| სარეკლამო ადგილი - 11 650 x 60 |
