ცოტა ხნის წინ ჩვენი ქვეყნის ეკონომიკაში სამი უმნიშვნელოვანესი ფაქტი და მოვლენა მოხდა, რომლებსაც საუკუნის პროექტები შეიძლება ვუწოდოთ. დამოუკიდებელი საქართველოს ისტორიაში განხორციელებული ყველაზე დიდი პროექტებია ერთი მხრივ, აღმოსავლეთ-დასავლეთის მიმართულების რიკოთის უღელტეხილის 27-კილომეტრიანი მონაკვეთი, ზესტაფონის შემოვლითი 9-კილომეტრიანი მაგისტრალი და სამხრეთ-ჩრდილოეთის მიმართულების ქვეშეთი-კობის უნიკალური გვირაბის გაჭრის დასრულება, - განაცხადა საპარლამენტო უმრავლესობის წევრმა, დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ დავით სონღულაშვილმა პლენარულ სხდომაზე გამოსვლისას.
როგორც მან აღნიშნა, ეს არ არის მხოლოდ კონკრეტული გზის მშენებლობა. გარდა იმისა, რომ მნიშვნელოვნად მცირდება მგზავრობის დრო, ეს პროექტები ასევე ეკონომიკური თვალსაზრისით არის მნიშვნელოვანი ეფექტის მომტანი. კერძოდ, მეწარმეებისთვის მარტივდება, როგორც გასაღების ბაზრებთან ხელმისაწვდომობა, ასევე მცირდება პროდუქციის თვითღირებულება.
„ასევე გასათვალისწინებელია, რომ „შუა დერეფნის“ კონტექსტში იზრდება საქართველოს, როგორც ლოგისტიკური და სატრანსპორტო ჰაბის მნიშვნელობა და ფუნქცია, რომელიც უკვე მატერიალიზებულია ბიუჯეტში კონკრეტული შემოსავლების სახით. ეკონომიკური ზრდის თვალსაზრისით გვექნება როგორც პირდაპირი, ასევე აკუმულირებული ირიბი ეფექტები. ეს არის სწორედ ის თანმიმდევრული ეკონომიკური რეფორმები და პროექტები, რომელსაც ჩვენი ხელისუფლება ახორციელებს და რომელსაც გრძელვადიანი სარგებლიანობის პერსპექტივაში ვუყურებთ“, - განაცხადა დავით სონღულაშვილმა.
| სარეკლამო ადგილი - 11 650 x 60 |
