საქართველოს პარლამენტის მუდმივმოქმედი დელეგაციის წევრმა ნატო-ს საპარლამენტო ასამბლეაში, განათლების, მეცნიერებისა და ახალგაზრდულ საქმეთა კომიტეტის თავმჯდომარემ, გივი მიქანაძემ, 6-7 მაისს ქ. რომში ნატო-ს საპარლამენტო ასამბლეის მიერ ორგანიზებულ ხმელთაშუა და ახლო აღმოსავლეთის სპეციალური ჯგუფის შეხვედრაში მიიღო მონაწილეობა.
შეხვედრის ფარგლებში განიხილეს ხმელთაშუა და ახლო აღმოსავლეთის ქვეყნებში არსებული უსაფრთხოების, ეკონომიკური, მიგრაციის, ენერგო და სოციალური საკითხები. დისკუსიის ფორმატში მხარეებმა ყურადღება გაამახვილეს რეგიონში რუსეთის ფედერაციის გაზრდილ აქტივობებზე.
ასევე, აღინიშნა, რომ მიუხედავად მოსკოვის უკრაინის წინააღმდეგ აგრესიული სამხედრო კომპანიისა, ნატო-ს წევრმა ქვეყნებმა არ უნდა დაივიწყონ ის რიგი უსაფრთხოების გამოწვევები, რომლებიც ალიანსის სამხრეთ ფლანგიდან არსებობს და საჭიროებს წევრი ქვეყნების უფრო აქტიურ ჩართულობას.
დეპუტატებმა ისაუბრეს თანამშრომლობის გაძლიერებაზე, რომელიც ფოკუსირებული იქნება ქმედითუნარიან ნაბიჯებზე და გაფართოებული დიალოგის საჭიროებაზე ალიანსის პარტნიორ ქვეყნებთან, რაც საჭიროებს ალიანსის განახლებული სტრატეგიის შემუშავებას და შემდგომში მის იმპლემენტაციას.
როგორც ჯგუფის შეხვედრის ფარგლებში აღინიშნა, ზემოხსენებული პროცესები უნდა აისახოს ნატო-ს მოახლოებულ სამიტზეც, რათა კიდევ ერთხელ ხაზი გაესვას არსებულ უსაფრთხოების გამოწვევებს, რაც ხმელთაშუა და ახლო აღმოსავლეთის რეგიონიდან შეიძლება წარმოიშვას. განსაკუთრებით რუსეთის ფაქტორის გათვალისწინებით. რომელიც მნიშვნელოვან უსაფრთხოების გამოწვევებთან არის დაკავშირებული. კერძოდ, რეგიონში არსებული ეკონომიკური და სოციალური სირთულეების და გამოწვევების გათვალისწინებით, რუსეთი შეეცდება ევრო-ატლანტიკურ სივრცეს კონვენციური და ჰიბრიდული სამხედრო მეთოდების გამოყენებით მცირე და საშუალო მასშტაბიანი დესტრუქციული კერები შექმნას.
დისკუსიის ფარგლებში ხაზი გაესვა ალიანსის წევრი ქვეყნების თავდაცვისა და მედეგობის შესაძლებლობების გაზრდის მნიშვნელობას, განსაკუთრებით ალიანსის სამხრეთ ფლანგის მიმართულებით.
სპეციალური ჯგუფის შეხვედრის ფარგლებში, სადაც საუბარი ასევე შეეხო შავი ზღვის რეგიონის მნიშვნელოვან როლს ევრო-ატლანტიკური უსაფრთხოების კუთხით, გივი მიქანაძემ კავკასიასა და ცენტრალურ აზიაში ნატო-ს გენერალური მდივნის სპეციალურს წარმომადგენლის ხავიერ კოლომინას გამოსვლასთან მიმართებაში, ყურადღება გაამახვილა იმ გამოწვევებზე, რაც დაკავშირებულია შავი ზღვის უსაფრთხოებასთან და შავი ზღვის გავლით, რუსეთის მიერ არაერთხელ შეფერხებული უკრაინის მარცვლეულის ტრანზიტის საკითხზე, რომელიც უმეტესწილად განკუთვნილია ხმელთაშუა და ახლო აღმოსავლეთის ქვეყნებისათვის.
როგორც ნატო-ს გენერალური მდივნის სპეციალურმა წარმომადგენელმა პასუხად აღნიშნა, ალიანსის მიდგომა სამხრეთ ფლანგისადმი არის 360 გრადუსით უსაფრთხოების და თავდაცვითი მექანიზმების გამოყენებით, მაგრამ მიუხედავად ამისა, მოსკოვი მაინც ახერხებს აქტივობების გაზრდას ამ რეგიონში. შესაბამისად შავი ზღვის სტრატეგიულ გეოპოლიტიკურ განლაგებას ნატო-ში მნიშვნელოვანი ყურადღება ეთმობა, რაც აისახება ალიანსის გაზრდილ თანამშრომლობაში შავი ზღვის რეგიონის ქვეყნებთან, განსაკუთრებით საქართველოსთან და ნატო-საქართველოს თანამშრომლობის არაერთი ფორმატით გამოიხატება.
ინფორმაციას საქართველოს პარლამენტის საზოგადოებასთან ურთიერთობის სამსახური ავრცელებს.
| სარეკლამო ადგილი - 11 650 x 60 |
