„ხალხის ძალის“ წევრი დავით ქართველიშვილი სენატორ ჯინ შაჰინის მიერ აშშ-ის ეროვნული თავდაცვის ავტორიზაციის აქტის კანონპროექტში ე.წ. „ქართველი ხალხის აქტის“ სახელით შეტანილი შესწორების წარდგენის საკითხს ეხმიანება.

როგორც ქართველიშვილი სოციალურ ქსელში წერს, შესწორება 2025 ფისკალური წლისთვის თავდაცვის დეპარტამენტის სამხედრო საქმიანობის, სამხედრო მშენებლობისა და ენერგეტიკის დეპარტამენტის თავდაცვითი საქმიანობის ან სხვა მიზნებისთვის დაფინანსებას გამოყოფას ეხება. თუმცა, აქვე აღნიშნავს, რომ სკეპტიკურად უყურებს იმის შესაძლებლობას, რომ გადაწყვეტილება საქართველოს სასარგებლოდ იქნება მიღებული.

„არც კი ვიცი, როგორ უნდა მოვექცეთ. 2021 წლის 25 თებერვალს სენატორმა ბობ მენენდესმა თავისი აღშფოთებული შეშფოთება გამოთქვა ქართული ოპოზიციის ლიდერის, ნიკანორ მელიას დაპატიმრების გამო. შესაბამისი ნაცნობი ფრაზებით შეშფოთდა - დემოკრატიის უკუსვლა და ა.შ. დღეს ამერიკის მანჰეტენის ფედერალური სასამართლოს ნაფიცმა მსაჯულებმა უკვე ბობ მენენდესი ცნეს დამნაშავედ ბრალდების 16 პუნქტში, მათ შორის კორუფციაში, მექრთამეობაში და უცხო ქვეყნის აგენტურულ საქმიანობაში. დამნაშავედ ცნეს ასევე მისი მეუღლე, ნადინ ასლანიანი. „ალავერდის" წესით, ალბათ ჩვენც გვმართებს აღშფოთებული შეშფოთების გამოხატვა ამერიკული დემოკრატიის უკუსვლის გამო და ბობ მენენდესის პოლიტპატიმართა კასტაში აღიარება ანჟელა დევისის და ლეონარდ პელტიერის საპატიო კამპანიაში. მაგრამ, ალბათ თავს შევიკავებთ და დანარჩენების მიმართ სამართლიანობის აღდგენას დაველოდებით. ამ დანარჩენებში, სენატის საერთაშორისო საქმეთა კომიტეტის ექს-თავმჯდომარე მენენდესის კოლეგებს, ჩვენთვის კარგად ნაცნობ სენატორებს - შაჰინსა და რიშს ვგულისხმობ. ეს ის კომიტეტი და ის სენატორებია, ვინც შარშან აპრილში, ვაშინგტონში, საქართველოდან ჩასული ჩვენი ალქაჯების თანდასწრებით და კელი დეგნანის დირიჟორობით არარსებულ გადაცდომებზე ოთხი ქართველი მოსამართლის ნაწილობრივი დასანქცირება მოახდინეს.

ეს ის ჯინ შაჰინია, რომელმაც დღეს ე.წ. „ქართველი ხალხის აქტი“ აშშ-ის ეროვნული თავდაცვის ავტორიზაციის აქტის კანონპროექტში შესწორების სახით წარადგინა, რომელიც 2025 ფისკალური წლისთვის თავდაცვის დეპარტამენტის სამხედრო საქმიანობის, სამხედრო მშენებლობისა და ენერგეტიკის დეპარტამენტის თავდაცვითი საქმიანობის ან სხვა მიზნებისთვის დაფინანსებას გამოყოფს. შორს ვართ იმ ილუზიებისაგან, რომ ეს შესწორება საქართველოს თავდაცვის სამინისტროსთვის გამოყოფილი თანხების გაზრდას ითვალისწინებს. ჩვენ არ ვართ ამერიკელების მიერ ტერორისტებად შერაცხილი თალიბანი, რომელსაც აშშ-მ შეიძლება 18 მილიარდის ღირებულების თანამედროვე შეიარაღება აჩუქოს. ჩვენ ვართ ამერიკელების მოკავშირე ხელისუფლება, რომელმაც ამ პარტნიორობას ერთობლივ საერთაშორისო მისიებში ათობით დაღუპულისა და ასობით დასახიჩრებულთა სახით სისხლიანი ზვარაკი გავიღეთ. ამიტომაც, ამერიკული ლოგიკით - ქართველების მკვლელებს მილიარდობით დოლარის ღირებულების იარაღი აჩუქეს, ხოლო ქართულ ჯარს სჯიან. უბრალოდ საინტერესოა, საქართველოს "დასჯის" თანხა იქნება თუ არა ბობ მენენდესისა და მისი მეუღლის მიერ კორუფციით, ქრთამებითა და უცხოეთის სპეცსამსახურებისთვის გაყიდულ საიდუმლო მასალებში აღებული თანხების ტოლფასი,“ - წერს დავით ქართველიშვილი.