მთელი ამ წლების განმავლობაში ჩვენი ქმედებით, ჩვენი ცვლილებებით, ჩვენი დამოკიდებულებით თუნდაც წინა ინვესტორთან, იმას ვავლენდით, რომ ყველანაირად მხარს ვუჭერთ ამ პროექტს, – ამის შესახებ ეკონომიკისა და მდგრადი განვითარების მინისტრმა  ნათია თურნავამ პარლამენტში საკომიტეტო მოსმენის შემდეგ განაცხადა.

მინისტრის განმარტებით, დღესაც მიდის მზადება ახალი ტენდერისთვის, რომელსაც გარკვეული დრო სჭირდება. ნათია თურნავას თქმით, ამ მიზნით მუშაობა გრძელდება საერთაშორისო საფინანსო ორგანიზაციებთან, მიდის კონსულტაციები, რომ სწორ დროს მოხდეს ამ ტენდერის გამოცხადება.

„ანაკლიის პორტი არის სტრატეგიული პროექტი და ის აუცილებლად განხორციელდება. სამწუხაროა, რომ ამდენი წელი დაგვიანდა“, – განაცხადა ნათია თურნავამ.

რაც შეეხება ფოთის პორტს, ეკონომიკისა და მდგრადი განვითარების მინისტრის განცხადებით, ეს ძალიან მნიშვნელოვანი პროექტია, რომელიც ძირითადად კერძო კაპიტალით ხორციელდება.

„დასაფასებელია, რომ დღესდღეობით, როდესაც გლობალური კრიზისია, ინვესტორებმა არ შეცვალეს თავისი დამოკიდებულება ასეთი მსხვილი პროექტის მიმართ და ჩვეულებრივად გრძელდება მისი განხორციელება. ეს პროექტი დაასაქმებს უამრავ ადამიანს და განხორციელდება ისევე, როგორც ბევრი სხვა ინფრასტრუქტურული პროექტი“, – განაცხადა ნათია თურნავამ.