280
21 ოქტომბერი 2025, 17:55
პარტია „ხალხის ძალის“ აღმასრულებელი მდივანი გურამ მაჭარაშვილი გიორგი გახარიას პარტიის გადაწყვეტილებას მედიასთან ეხმიანება.
დეპუტატმა აღნიშნა, რომ გახარიას პარტიას პარლამენტი არც არასდროს დაუტოვებია, ისინი უბრალოდ ბოიკოტის რეჟიმში იყვნენ.
„თუ პარლამენტში ბოიკოტის რეჟიმში იყვნენ, არ გამოდიოდნენ და მიზეზად ასახელებდნენ, რომ არალეგიტიმურია პარლამენტი, ახლა რომელი რიცხვიდან გახდა ლეგიტიმური?“- განაცხადა გურამ მაჭარაშვილმა და განმარტა, რომ გახარიას პარტიის გადაწყვეტილება, ბოიკოტის რეჟიმის დასრულებასთან დაკავშირებით, მათი პარტიის რეიტინგის დავარდნას უკავშირდება.
„პირველ რიგში უნდა ვთქვათ, რომ გახარია რეალურად არც შესულა და არც გამოსულა არსად, ის და მისი პარტია იყვნენ პარლამენტში, თუმცა ბოიკოტის რეჟიმში და ამბობდნენ, რომ პარლამენტი ლეგიტიმური არ იყო. მოდით დავუსვათ კითხვა გახარიას და მის წარმომადგენლებს - როდიდან გახდა ეს პარლამენტი მათთვის და მათი პატრონებისთვის ლეგიტიმური?
ანუ თუ პარლამენტში ბოიკოტის რეჟიმში იყვნენ, არ გამოდიოდნენ და მიზეზად ასახელებდნენ, რომ არალეგიტიმურია პარლამენტი, ახლა რომელი რიცხვიდან გახდა ლეგიტიმური? ამ შემთხვევაში ეს არაფერ შუაშია, ზოგადად, კარგად ვიცით, რომ მისი პარტიის რეიტინგი დავიდა თითქმის ნულამდე, მისივე არასწორი და არათანმიმდევრული ნაბიჯების გამო. თვითონ გაიქცა გერმანიაში და შემდეგ იქ ყოფნის მიზეზად თქვა, რომ რაღაც მოლაპარაკებებზეა რამდენიმე თვეა უკვე. საინტერესოა რა მოლაპარაკებებშია ამ რამდენიმე თვის განმავლობაში - რაიმე საერთაშორისო პრობლემებს წყვეტს და მსოფლიო გამოწვევებს ებრძვის თუ რა? ორი თუ სამი თვეა წასულია და საინტერესოა ეს საკითხი. ამ დიდი მოლაპარაკებების პარალელურად, მან ნახა, რომ პარტიის რეიტინგი ნულამდეა დასული და იფიქრა, იქნებ პარლამენტში შესვლამ უშველოს. ეს არის იმ გადაწყვეტილების ახსნა, რაც მიიღო გახარიამ,“- განაცხადა გურამ მაჭარაშვილმა.
| სარეკლამო ადგილი - 11 650 x 60 |
