„ყველაზე მთავარი ინსტრუმენტი, რომელსაც დღესდღეობით გარე ძალები ფლობენ არის საუბრის, დისკუსიის ჩაკვლა. სინამდვილეში, ბრიუსელმა დღეს საქართველოში საკუთარი მომხრეებისა და მიმდევრების ხელით ჩაახშო დისკუსია. არანაირი განხილვა, მხოლოდ ლოზუნგები”, - განაცხადა შალვა პაპუაშვილმა რუსთავი 2-ის გადაცემა „ღამის კურიერის” ეთერში.
როგორც შალვა პაპუაშვილმა აღნიშნა, ევროკავშირი მშვიდობისთვის შეიქმნა, თუმცა, ბრიუსელი დღეს მხოლოდ ომზე საუბრობს.
„სინამდვილეში, ევროპის დროშა დააჭერინეს ხალხს და აქციეს ლოზუნგების ქვეყნად, რომელიც ჩვენ 90-იან წლებში მოვიტოვეთ. ხანდახან ჩვენ თვითონ, ირონიულად ვუწოდებდით საკუთარ თავს „ლოზუნგების ქვეყანას“ და მიამიტურად ვუყურებდით გარკვეულ საკითხებს.
ამ გზით, მათ თავიანთი მხარდამჭერები დაცალეს ყველაფერი იმისგან, რაც რეალურად ევროპულია და სწორედ ამიტომ თქვა აშშ-მ აღნიშნულ უსაფრთხოების სტრატეგიაში, რომ ევროკავშირი დღეს დგას ცივილიზაციური კრიზისის წინაშე. მათ სარკეში ჩაახედეს ევროკავშირს და ბრიუსელს და უთხრეს, რომ უკვე აღარაფერი აკავშირებთ იმ ფასეულობებთან, რომელთა საფუძველზეც ევროკავშირი შეიქმნა. ისინი დასცილდნენ ქრისტიანულ ღირებულებებს, როდესაც საუბრობენ ყალბ იდეოლოგიებზე, რომ ადამიანმა შეიძლება გაიღვიძოს და თქვას, დღეს ეს სქესი ვარ და ხვალ ის სქესი ვარ, დაცალეს დემოკრატიისგან, როდესაც უმცირესობების ხელისუფლებები არის და დაცალეს მთავარი იდეისაგან, რომელიც არის მშვიდობა - ევროკავშირის მთავარი გამაერთიანებელი. სწორედ მშვიდობისთვის შეიქმნა ევროკავშირი, თუმცა დღეს მხოლოდ ომზე საუბრობს ბრიუსელი. ომი, გამალებული შეიარაღება, ლამის ცივი ომის ტერმინები დააბრუნეს. მათ შორის, გერმანიაში სავალდებულო გაწვევა კვლავ დაბრუნდა კანონში რამდენიმე ათეული წლის შემდეგ და ამასთან დაკავშირებით საპროტესტო გამოსვლებია. ზუსტად იმ ღირებულებებისგან ცლიან ევროკავშირს, რომლებზეც ის არის დაფუძნებული. სწორედ ამაზე მიანიშნა აშშ-მ ევროკავშირს აღნიშნულ სტრატეგიულ დოკუმენტში”, - განაცხადა პაპუაშვილმა.
| სარეკლამო ადგილი - 11 650 x 60 |
