2019 წლის სახელმწიფო ბიუჯეტის პროექტში ცვლილებები  დღეს პარლამენტის საფინანსო-საბიუჯეტო კომიტეტის შემაჯამებელ სხდომაზე  განიხილეს. კომიტეტის თავმჯდომარის, განცხადებით, დოკუმენტი შენიშვნებით მთავრობას დღეს უკან დაუბრუნდება. ირაკლი კოვზანაძის თქმით, შენიშვნებიდან ერთ-ერთი ეკონომიკური ზრდის პარამეტრს ეხება, რომელიც შენარჩუნებულია 4.5 %-ის დონეზე, მაშინ როდესაც მიმდინარე წლის განვლილი პერიოდის განმავლობაში უფრო მაღალი 5-პროცენტიანი მაჩვენებელი ფიქსირდება. კიდევ ერთი შენიშვნა ინფლაციის საპროგნოზო მაჩვენებელს უკავშირდება.

შეგახსენებთ, სახელმწიფო ბიუჯეტის შემოსულობების მოცულობა 92,8 მილიონი ლარით იზრდება და 2 965,5 მილიონ ლარს შეადგენს, ხოლო გადასახდელების - 223,1 მილიონი ლარით. განათლების სამინისტროს დაფინანსება 131 მილიონი ლარით იზრდება, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს -10 მილიონი ლარით, შსს-ს დაფინასება 25 მილიონით. ინფრასტრუქტურულ პროექტებზე კი დამატებით 130 მილიონი ლარია გათვალისწინებული.