„მიუხედავად პოლიტიკურად ანგაჟირებული პირების მხრიდან მცდელობისა რომ შექმნან ფონი, თითქოს ქვეყანაში ყველაფერი ცუდადაა - მონაცემები სხვაგვარად მეტყველებს. ქვეყანა ვითარდება და იზრდება ეკონომიკა,“ - განაცხადა თსუ ანალიზისა და პროგნოზირების ცენტრის გამგეობის თავმჯდომარე ოთარ ანგურიძემ „საქსტატის“ მიერ 2020 წლის იანვარში საგარეო ვაჭრობის მონაცემების კომენტირებისას.

ექსპერტის განცხადებით, 2019 წლის საგარეო ვაჭრობის რეკორდული ტემპი ( 3 771 მლნ აშშ დოლარი) 2020 წელსაც გაგრძელდა და იანვარი ექსპორტის 10%-იანი ზრდით დაიწყო და 262,3 მლნ აშშ დოლარი შეადგინა. ჯამურად, სავაჭრო დეფიციტი 0,2%-ით გაუმჯობესდა და 357,1 მლნ აშშ დოლარი დაფიქსირდა.
„ექსპორტის ზრდის გაუმჯობესება მეტყველებს, რომ ქვეყანაში იქმნება უფრო მეტი დამატებული ღირებულება და უმჯობესდება მიმდინარე ანგარიშის დეფიციტი, რაც, საბოლოოდ, აისახება მოსახლეობის დასაქმების სტატისტიკასა და სოციალური მდგომარეობის გაუმჯობესებაზე,“ - განაცხადა ოთარ ანგურიძემ.