„მთელი რიგი ქვეყნების მიერ „ვაგნერი“ ტერორისტულ ორგანიზაციად არის ცნობილი; ბახმუტის მიწასთან გასწორება „ვაგნერის“ სისხლიან, არაადამიანურ ნამუსზე არის - ამ ადამიანების გამოყენება და ამით სიხარული ხომ პოლიტიკური შიზოფრენიაა?“, - ამის შესახებ გადაცემა „პოლიტიკურ პოსტში“ „ხალხის ძალის“ წევრმა დავით ქართველიშვილმა განაცხადა. 

მისი თქმით, პრიგოჟინის სამხედრო-პოლიტიკური ავანტიურა უნდა გვაინტერესებდეს მხოლოდ იმ შედეგებით, რომელიც შეიძლება საქართველოს დაუდგეს.

„ამ ე.წ. ერთიან ოპოზიციასთან დაკავშირებით ჩვენ კვლავ ერთიანი სამშობლოს, პრინციპების, საბაზისო, გამაერთიანებელი ფასეულობების პრიზმით ვუდგებით საკითხს, რაც აბსოლუტურად არასწორია. რამეში ჩანს მათი მიკუთვნილობა რომელიმე სამშობლოს - მით უმეტეს, საქართველოს მიმართ? მათთვის ხომ სულ ერთია რა სადენს წაუკიდებენ ცეცხლს და რომელ დენთის კასრს ააფეთქებენ. მათთვის არანაირ მორალურ-ეთიკურ მნიშვნელობას არ წარმოადგენდა იმ „ვაგნერის“ გულშემატკივრობა, რომელიც უკრაინელ ტყვეებს სასტიკად აწამებდა. მთელი რიგი ქვეყნების მიერ „ვაგნერი“ ტერორისტულ ორგანიზაციად არის ცნობილი. რუსეთ-უკრაინის ომში უკვე 46 ქართველი მებრძოლი დაიღუპა. იქიდან რამდენი ქართველია „ვაგნერის“ ხელით  მოკლული, ვინმეს დათვლილი აქვს? ბახმუტის მიწასთან გასწორება ხომ „ვაგნერის“ სისხლიან, არაადამიანურ ნამუსზე არის. და ამ ადამიანების გამოყენება და ამით სიხარული რას მივაწეროთ? ეს ხომ არის პოლიტიკური შიზოფრენია? ვერავითარ ლოგიკურ მარცვალს ვერ ვხედავ ამაში. 

ისევ პრიგოჟინის სამშობლოშია გამონათქვამი და გამოვიყენებ - „ხანდახან სჯობს სიჩუმე შეინარჩუნო, მიუხედავად იმისა, რომ შეიძლება იდიოტის შთაბეჭდილებას ქმნიდე ამით, ვიდრე ამოიღო ხმა და ამაში უკანასკნელი ეჭვებიც კი გაფანტო“. რამდენი „ექსპერტი“ ამოტივტივდა - სამხედრო, პოლიტიკური; რამდენმა პოლიტიკურმა იდიოტმა ამოიღო ხმა, როდესაც ეიფორიით იძახოდნენ, რომ „დღეს პრიგოჟინები არიან“ და ა.შ. ეს რომ ასეთი ქცევის პრეცედენტი ყოფილიყო, კიდევ ხმას არ ამოვიღებდი, მაგრამ მახსოვს, 2014 წელს რუსეთში დაიჭირეს ნადეჟდა სავჩენკო და შპიონაჟის გამო სასჯელი მიუსაჯეს. ბევრი ნაცი იყო გამოსული რუსთაველზე თუ ვაკის პარკთან, რომლებიც აპროტესტებდნენ ამ სივერაგეს. როდესაც გამოუშვა პუტინმა ეს სავჩენკო და რადამ დეპუტატის ხარისხით შეიყვანა პარლამენტში, იქ უკვე უკრაინელებმა რომ დააკავეს იმავე მუხლით - შპიონაჟი, ოღონდ ამჯერად რუსეთის სასარგებლოდ, რომელიმე ნაცი გინახავთ მის დასაცავად გამოსული? დაახლოებით იგივე სურათი აღიბეჭდა ამ პრიგოჟინთან და სამხედრო-პოლიტიკურ ავანტიურასთან მიმართებით, რომელიც, წესით და რიგით, კულუარულად არც უნდა გვეხებოდეს და იმ კონსპიროლოგიურ მოსაზრებებში არც უნდა შევდიოდეთ. ჩვენ უნდა გვაინტერესებდეს ეს მხოლოდ იმ შედეგებით, რომელიც შეიძლება საქართველოს დაუდგეს.“, - განაცხადა დავით ქართველიშვილმა.