სააკაშვილზე ევროსასამართლოს სხვა პასუხის შემთხვევაში, უნდა დამდგარიყო ევროსაბჭოდან საქართველოს გარიცხვის საკითხი - „ქართულმა ოცნებამ" თუ ასე გააგრძელა, კაცმა არ იცის რა მოხდება - ამის შესახებ „მთავარი არხის“ დამფუძნებელმა, ნიკა გვარამიამ ჟურნალისტებთან მას შემდეგ განაცხადა, რაც კლინიკა „ვივამედში“ მიხეილ სააკაშვილი მოინახულა.
„ევროსასამართლოსთვის მიმართვა იყო დრამატული შეცდომა. ეს ჩემი მოსაზრებაა. ევროსასამართლოს არ უთქვამს, რომ მიხეილ სააკაშვილი არ არის მძიმედ ავად. ევროსასამართლომ თქვა, რომ საქართველოს ხელისუფლება იღებს საკუთარ თავზე პასუხისმგებლობას, რომ იგი არ მოკვდეს და ეს იყო ძალიან პროგნოზირებადი, რომ ასეთი იქნებოდა ევროსასამართლოს პასუხი. ევროსასამართლოს სხვა პასუხის შემთხვევაში, პრაქტიკულად უნდა დამდგარიყო ევროსაბჭოდან საქართველოს გარიცხვის საკითხი. ასეთი საკითხის დაყენებისთვის ჯერჯერობით მზად არ არის ევროსტრუქტურები. თუ ასე გააგრძელა "ქართულმა ოცნებამ" , კაცმა არ იცის რა მოხდება, მაგრამ ეს მიმართვა იყო შეცდომა, იმიტომ რომ ნავალნის პრეცედენტი არ არის სიმეტრიული პრეცედენტი, რადგან ნავალნისთან დაკავშირებით საკუთრივ რუსეთის ხელისუფლება ამბობდა, რომ ყველაფერს ვაკეთებთ, მაგრამ არ ვიცით, რა სჭირს და კვდებაო. საქართველოს ხელისუფლება ამას არ ამბობს. საქართველოს ხელისუფლება ამბობს, რომ „ჩვენ ყველაფერს ვაკეთებთ და ვიცით რა სჭირს და ის არ მოკვდება“. აი, ეს იყო განსხვავება. ამიტომ ამაზე 100-ჯერ და კიდევ უფრო მეტჯერ დაფიქრება ღირდა. ეს არ უნდა გაეკეთებინათ იმ მარტივი მიზეზის გამო, რომ ეს იყო უბრალოდ პროპაგანდისთვის საჩუქარი", - განაცხადა გვარამიამ.
| სარეკლამო ადგილი - 11 650 x 60 |
