ყველანაირი ისტერია კინოცენტრის დელეგაციასთან დაკავშირებით მხოლოდ უსახური პროპაგანდის და პოლიტიკური სპეკულაციის ნაწილია. წლევანდელი ქართული სტენდი, როგორც გაშუქების, ისე საქმიანი შეხვედრების მხრივ იქნება ყველაზე ინტენსიური და მასშტაბური და მოემსახურება ქართული კინემატოგრაფის ინტერესებს, რომელსაც ასე აქტიურად ცდილობენ სახელი შეულახონ საერთაშორისო კინოსივრცეებში მავნებლებმა, - ამის შესახებ ეროვნული კინოცენტრის ფილმწარმოების დეპარტამენტის უფროსი ბაჩო ოდიშარია სოციალურ ქსელში წერს.

ოდიშარიას თქმით, აბსოლუტურად ყველა დელეგატი არის თავის საქმის პროფესიონალი, სიის აბსოლუტური უმრავლესობა ქართველი რეჟისორებისა და პროდიუსერებისგანაა დაკომპლექტებული, ხოლო „პოს ტვ“-ის და „იმედი“-ს გამშუქებლები სიაში მოხვდნენ იმისთვის, რომ ფესტივალის ირგვლივ მედია გაშუქება და სიუჟეტების დამზადება უზრუნველყონ, რაც ძალიან ჩვეულებრივი და მარტივი პრაქტიკაა.

„ოპოზიციურ მედიაში ჩვეულ, მანიპულაციურ სტილში აიტაცეს კინოცენტრის დელეგაციაში მყოფი მედიის წარმომადგენლების საკითხი. აბსოლუტურად ყველა დელეგატი არის თავის საქმის პროფესიონალი, სიის აბსოლუტური უმრავლესობა ქართველი რეჟისორებისა და პროდიუსერებისგანაა დაკომპლექტებული; 23 რეჟისორი/პროდიუსერი, 5 კინოცენტრის თანამშრომელი, 4 მედია გამშუქებელი. ეს ნაწილი რასაკვირველია ნაცმედიის სათაურებში არ ხვდება. იქ ხვდება მხოლოდ „პოსტვს“ და „იმედის“ გამშუქებლები. ეს უკანასკნელნი, სიაში მოხვდნენ იმისათვის, რომ ფესტივალის ირგვლივ მედია გაშუქება და სიუჟეტების დამზადება უზრუნველყონ, რაც ძალიან ჩვეულებრივი და მარტივი პრაქტიკაა. და დიახ, რასაკვირველია კინოცენტრი ზრუნავს რომ მაქსიმალურად გაშუქდეს ქართული სტენდი და მისი აქტივობები ბერლინალეზე.

დღეს აღარაა ის პერიოდი, როდესაც მერაბიშვილ-ახალაიას კაბინეტებში დგებოდა კულტურის აქტივობების და იქ მონაწილე ადამიანების სია, არც ის დროა, სახელმწიფო ბიუჯეტის ხარჯზე ბოტოქსები და სტროპტიზ ბარებში გულაობები რომ ფინანსდებოდა, არც პოპულარული სერიალები ცენზურდება, როგორც ეს „ცხელი ძაღლის“ შემთხვევაში მოხდა, არც სტუდიები იხურება და მასალები უნადგურდება, როგორც ეს სტუდია „რაკურსის” შემთხვევაში მოხდა, არც ახალგაზრდა რეჟისორებს უშლიან გადაღებულ მასალებს და ატარებენ განყოფილებებში 2008 წლის ომზე დოკუმენტური ფილმის გადაღების გამო, როგორც ეს ედმონდ მინაშვილს გაუკეთეს. ყველანაირი ისტერია კინოცენტრის დელეგაციასთან დაკავშირებით მხოლოდ უსახური პროპაგანდის და პოლიტიკური სპეკულაციის ნაწილია.

წლევანდელი ქართული სტენდი, როგორც გაშუქების, ისე საქმიანი შეხვედრების მხრივ იქნება ყველაზე ინტენსიური და მასშტაბური და მოემსახურება ქართული კინემატოგრაფის ინტერესებს, რომელსაც ასე აქტიურად ცდილობენ სახელი შეულახონ საერთაშორისო კინოსივრცეებში მავნებლებმა. კინოცენტრის სტენდზე რასაკვირველია ოპოზიციური მედია პოზიტიურ ჭრილში არაფერს ისაუბრებს, მაგრამ ისაუბრებენ მამუკა ხაზარაძის ფონდით დაფინანსებულ ბერლინალეს სტენდზე, რომელთანაც „კრიტიკული კითხვები” არ გაჩნდება, მაშინ, როდესაც, ღიად წინასაარჩევნო ამომრჩევლის მოსყიდვასთან გვაქვს საქმე. პ.ს. თუ ატეხილი ისტერიის ერთ-ერთი მიზეზი ისაა, რომ 23 კინოს დარგის წარმომადგენელში ვერ მოხვდით, ეგ სხვა საკითხია და მაშინ ამის ირგვლივ გაშალეთ საუბარი “- წერს ოდიშარია Facebook-ზე.