„ხალხის ძალის“ წევრი დავით ქართველიშვილი ვლადიმერ პუტინის ინაუგურაციაში ევროპული სახელმწიფოების დიპლომატების მონაწილეობას აფასებს. როგორც ის სოციალურ ქსელში წერს, საპრეზიდენტო ინაუგურაციას, მიუხედავად ვაშინგტონის არაორაზროვანი მითითებისა, მაინც დაესწრო ევროკავშირის რამდენიმე წევრი-ქვეყნის მოსკოვში აკრედიტებული ელჩი.
დავით ქართველიშვილი ფაქტს დემარშად აფასებს და მიზეზებზეც საუბრობს. ამავდროულად, აქცენტს აკეთებს ევროპელების ინტერესებზე და იხსენებს იმას, თუ როგორი გამალებული სავაჭრო ურთიერთობები აქვს რუსეთთან მთელ რიგ ევროპულ სახელმწიფოს. ორი რამ, რაც „ხალხის ძალის“ წევრს აღელვებს, არის ის, რომ დავიწყებას მიეცა 2009 წლის 9 მაისს - საქართველო, ხოლო წელს - უკრაინა და პუტინის კრიმინალობა.
„როგორც ფაქტი, მაინც უნდა დავაფიქსირო და არა იმის გამო, რომ ევროპელების პოზიციაში ვერევი. დიახ, საერთაშორისო სისხლის სამართლის სასამართლოს მიერ ძებნილი რუსეთის მოქალაქის ვლადიმერ პუტინის გუშინდელ საპრეზიდენტო ინაუგურაციას, მიუხედავად ვაშინგტონის არაორაზროვანი მითითებისა, მაინც დაესწრო ევროკავშირის რამდენიმე წევრი-ქვეყნის მოსკოვში აკრედიტებული ელჩი. როგორც მინიმუმ, სამზე მაქვს დადასტურებული ინფორმაცია: სლოვაკეთი, უნგრეთი, საფრანგეთი.
ამ დემარშს შეიძლება ჰქონდა ორი სავარაუდო მიზეზიდან ან ერთ-ერთი, ან ორივე ერთად: ეს ქვეყნები არ იზიარებენ ჰააგის სასამართლოს პოზიციას ან საფრანგეთის პრეზიდენტის ხაზის დაფიქსირებას "აწვებიან", თუ რით განსხვავდება პარტნიორული ურთიერთობა აშშ-თან მათი ვასალური ვარიანტისაგან. ასეა თუ ისე, აგვისტოს ომიდან სულ რაღაც 9 თვეში, 2009 წლის 9 მაისს მოსკოვის წითელ მოედანზე გაერთიანებულ სამხედრო აღლუმში მონაწილე ბრიტანელი, ფრანგი, პოლონელი, უკრაინელი და ა.შ. სამხედრო მოსამსახურეები გამახსენდა. გამახსენდა დღესდღეობით სხვადასხვა პოზიციაში რუსეთთან რეკორდულ სავაჭრო ბრუნვაზე გასული სანქციებს-მიერთებული ფარისეველი ევროპული სახელმწიფოები.
რაც შეეხება იმას, თუ რა მიეცა დავიწყებას: 2009 წლის 9 მაისს - საქართველო (ხოლო 2010 წლის 9 მაისის აღლუმის საერთაშორისო კონტინგენტი კიდევ უფრო მასშტაბური იყო), ხოლო წელს - უკრაინა და პუტინს კრიმინალობა.
ტრადიციულად ჩვენი ფეიკ-ოფშორ-მედიასაშუალებებს „კრავთა დუმილი" აქვთ ამ ამბის გაშუქებაზე - საქართველოში საფრანგეთის საელჩოსთან საპროტესტო მიტინგი არ იგეგმება. სამაგიეროდ იგეგმება ისეთ „ღირსეულ" ევროპაში დაჩქარებული ტემპით შესვლის პერფორმანსი, რომელსაც გუშინ კრემლის დიდ სასახლეში საფრანგეთის ელჩი პიერ ლევი განასახიერებდა. „ალლო, ბალაკლავა, ბალაკლავა!" - თქვენ ამ პრინციპებში ბოლო-ბოლო რომელ მხარეზე ხართ, თავადაც ჩამოყალიბდით და იქნება ჩვენც გაგვაგებინოთ?“ - წერს დავით ქართველიშვილი.
| სარეკლამო ადგილი - 11 650 x 60 |
