„ბიზნეს ინსაიდერ ჯორჯიას“ დამფუძნებელმა გიორგი აბაშიშვილმა გადაცემაში „არჩევანის პირისპირ“ ეკონომიკაზე პოლიტიკური პროცესების გავლენებზე ისაუბრა. მისი შეფასებით, გასული წლის ანალოგიურ პერიოდში საზოგადოებაში ფუჭი პოლიტიკური მოლოდინების შექმნას გაცილებით ძლიერი ეფექტი ჰქონდა ეკონომიკაზე, ვიდრე დღეს, რაც აისახებოდა ეკონომიკურ აქტივობაზე, ლარის კურსზე და ქართული კომპანიების აქციებზე ლონდონის საფონდო ბირჟაზე.
„ავიღოთ დღევანდელი ვითარება - რევოლუციაზე მეტი უბედურება რა უნდა დაანონსდეს ეკონომიკისთვისა და ბიზნესებისთვის? წარმოვიდგინოთ, რომ საზოგადოებას ამ რევოლუციის სჯერა. ახლა იცით, რა უნდა ხდებოდეს? ეკონომიკური აქტივობა უნდა იყოს დაცემული, ადამიანები უნდა იშორებდნენ კაპიტალს, ბანკებიდან უნდა გამოჰქონდეთ ფული, უნდა ცარიელდებოდეს ბანკომატები, ანაბრებიდან თანხები უნდა გამოიტანონ.
ახლა რასაც ვუყურებთ, მსგავსი ტიპის ქცევა არ ფიქსირდება. ეს მიუთითებს იმაზე, რომ გაცილებით მედეგი გახდა საზოგადოება ფუჭი შიშების მიმართ, რომლებსაც ქმნიან. როდესაც საზოგადოება რაღაცაზე რეაგირებს, ეს იმას კი არ ნიშნავს, რომ ვინც აშინებს, იმას ემხრობა. უბრალოდ ეშინია, როცა რაღაც ტიპის პრობლემა იქმნება. ეკონომიკური ვარდნა იქნებოდა ახლა, მაშინ, როცა ჩვენ ვსაუბრობთ 8%-იან ზრდაზე“, - განაცხადა აბაშიშვილმა.
მან ასევე აღნიშნა, რომ ამ ტენდენციას საერთაშორისო სავალუტო ფონდიც ადასტურებს, რომელმაც საქართველოს ეკონომიკური აქტივობის ზრდის პროგნოზი 6-დან 7.2%-მდე გაზარდა.
| სარეკლამო ადგილი - 11 650 x 60 |
