აზერბაიჯანის პრეზიდენტმა, ილჰამ ალიევმა დაგმო უკრაინაში აზერბაიჯანის საელჩოზე განხორციელებული კიდევ ერთი სარაკეტო თავდასხმა.
ამის შესახებ აზერბაიჯანის პრეზიდენტმა, უკრაინის პრეზიდენტ ვოლოდიმირ ზელენსკისთან სატელეფონო საუბრისას განაცხადა.
ალიევმა სერიოზული შეშფოთება გამოთქვა და ხაზგასმით აღნიშნა, რომ დიპლომატიური მისიების წინააღმდეგ მსგავსი თავდასხმები მიუღებელია საერთაშორისო სამართლის ნორმებისა და პრინციპების მიხედვით.
14 ნოემბერს, დაახლოებით ღამის 01:00 საათზე, უკრაინის დედაქალაქ კიევზე სარაკეტო და დრონებით განხორციელებული თავდასხმების შედეგად, „ისკანდერის“ ტიპის ერთ-ერთი რაკეტა აზერბაიჯანის საელჩოს ტერიტორიაზე დაეცა. ამასთან დაკავშირებით, რუსეთის ფედერაციის საგანგებო და სრულუფლებიანი ელჩი აზერბაიჯანის რესპუბლიკაში, მიხეილ ევდოკიმოვი, საგარეო საქმეთა სამინისტროში დაიბარეს. ამასთან დაკავშირებით მას გამოუცხადეს მკაცრი პროტესტი და წარუდგინეს შესაბამისი ნოტა.
ბოლო აფეთქების შედეგად, საელჩოს ტერიტორიის ღობის ნაწილი მთლიანად განადგურდა, დაზიანდა ნაგებობები, სამსახურებრივი მანქანები, საელჩოს ადმინისტრაციული შენობა და საკონსულო განყოფილება, ასევე სერიოზულად დაზიანდა დიპლომატიური მისიის ტერიტორია.
| სარეკლამო ადგილი - 11 650 x 60 |
