ბერლინის პროკურატურამ 18 წლის სკოლის მოსწავლის წინააღმდეგ სისხლის სამართლის გამოძიება დაიწყო გერმანიის კანცლერის, ფრიდრიხ მერცის შეურაცხყოფის გამო. ინფორმაციას Deutsche Welle ავრცელებს.
საქმე ეხება 5 მარტს გამართულ დემონსტრაციას, რომლის დროსაც ადამიანები სამხედრო სამსახურში გაწვევის ახალ წესს აპროტესტებდნენ. მიტინგში სახელწოდებით „სასკოლო გაფიცვა გაწვევის წინააღმდეგ“ მონაწილეობა რამდენიმე ათასმა სკოლის მოსწავლემ მიიღო.
გამოძიებას საფუძვლად დაედო პლაკატი, რომელიც ერთ-ერთ ახალგაზრდას ეკავა. პლაკატზე მერცის შესახებ უხამსი სიტყვები ეწერა. პლაკატი ამოიღეს, ხოლო მისი მესაკუთრის წინააღმდეგ გამოძიება დაიწყეს.
როგორც ბერლინის პოლიციის წარმომადგენელმა განაცხადა, საქმე აღძრულია მუხლით „ცილისწამება და პოლიტიკური თანამდებობის პირის მისამართით შეურაცხმყოფელი ცნობების გავრცელება“. გერმანული კანონმდებლობით, ცილისწამება და პოლიტიკური თანამდებობის პირის მისამართით შეურაცხმყოფელი ცნობების გავრცელება სისხლისსამართლებრივი წესით დასჯადი ქმედებაა და საპატიმრო სასჯელით ისჯება.
გერმანული სააგენტო dpa, თავის მხრივ, ავრცელეს ინფორმაციას, რომ ბოლო დროს მსგავსი გამოძიება გერმანიის სხვა ქალაქებშიც მიმდინარეობს. მაგალითად, ქალაქ ჰაილბრონის პოლიცია ადრე აცხადებდა, რომ გამოძიებას აწარმოებდა მერცის მისამართით Facebook-ში გაკეთებული კომენტარის გამო. პოლიციაში აცხადებენ, რომ დანაშაულის ნიშნების არსებობის შემთხვევაში ისინი ვალდებულნი არიან შემოწმება დაიწყონ.
| სარეკლამო ადგილი - 11 650 x 60 |
