კორუფციული სქემით გახარჯული 9 მილიონი ლარი, ცალსახად და ერთმნიშვნელოვნად წარმოადგენდა მიხეილ სააკაშვილის პირადი კომფორტისა და ფუფუნებისთვის დანაშაულებრივად გაფლანგულ თანხას, რასაც არანაირი შეხება არ ჰქონია სახელმწიფოს ლეგიტიმურ მიზნებთან, - აცხადებს პროკურორი გიორგი მუჯირი.
მისივე თქმით, მხოლოდ და მხოლოდ სააკაშვილი იღებდა გადაწყვეტილებას, თუ ვინ ისარგებლებდა „ამ ტიპის დანახარჯებით“.
„კორუფციული სქემით, დანაშაულებრივად გახარჯული თანხით თუ ვინ ისარგებლებდა, რა მოცულობით, სად და როდის - ამაზე გადაწყვეტილებას იღებდა მხოლოდ და მხოლოდ მიხეილ სააკაშვილი. თვითონ იღებდა გადაწყვეტილებებს, თუ ვინ შეძლებდა მისი გარემოცვიდან ამ ტიპის დანახარჯებით სარგებლობას“, - აღნიშნა პროკურორმა.
სახელმწიფო ბიუჯეტიდან ცხრა მილიონ ლარამდე გაფლანგვის საქმეზე სააპელაციო სასამართლომ გამამტყუნებელი განაჩენი ძალაში დატოვა. მიხეილ სააკაშვილსა და თემურ ჯანაშიას თანხის დაბრუნება დაევალათ.
| სარეკლამო ადგილი - 11 650 x 60 |
