ძირითადი ბირთვი ჩვენი მოსახლეობის ინფორმირებულია და მომზადებულია იმისთვის, რომ ხელისუფლებასთან ერთად დაიცვას საკუთარი ქვეყნის ინტერესები, არ მისცეს არავის პროვოკაციის საშუალება, რომ აქ რაიმე ექსცესები მოხდეს, - განაცხადა საქართველოს პრეზიდენტმა მიხეილ ყაველაშვილმა გადაცემაში „იმედის კვირა“.
როგორც პრეზიდენტმა აღნიშნა, ქვეყანამ არ უნდა დაუშვას შეცდომა, რადგან ეს გაანადგურებს იმას, რაც წინაპრებმა ჩვენამდე მოიტანეს - ენა, კულტურა, სარწმუნოება, ტრადიციები.
„მუდმივად უნდა ვიყოთ ფრთხილად, ფხიზლად, მტკიცედ, ჩვენი ეროვნული ინტერესების დამცველები. არცერთ იმპერიას და არცერთ სახელმწიფოს არ უჩუქებია ეს მიწა ჩვენთვის. ამას იცავდა ჩვენი წინაპარი. მშვიდობა იმიტომ გვინდა, რომ აქამდე მოსული ჩვენი სახელმწიფო, ქართული სახელმწიფო, რომელსაც გააჩნია თავისი ენა, კულტურა, სარწმუნოება, ტრადიციები, ამის დაცვაზეა საზრუნავი და ერთი დაშვებული შეცდომა ანადგურებს მთლიანად რაზეც მე ვილაპარაკე“, - განაცხადა მიხეილ ყაველაშვილმა.
| სარეკლამო ადგილი - 11 650 x 60 |
