თბილისის მერი კახა კალაძე აცხადებს, რომ ევროკავშირის რეკომენდაციების უმრავლესობა ზედმიწევნით შესრულდება, პირველი რეკომენდაციის შესრულება კი, რომელიც პოლარიზაციის დასრულებას ეხება, ოპოზიციასთან თანამშრომლობის გარეშე შეუძლებელია.
კალაძე არ გამორიცხავს, რომ იმ გადაწყვეტილების ფონზე, როდესაც საქართველო დაჩაგრეს და კანდიდატი ქვეყნის სტატუსი არ მისცეს, ქვეყანა შესაძლოა ახლაც სტატუსის გარეშე დარჩეს.
„ცხადია ცალმხრივად ვერ მოხდება [დეპოლარიზაცია], შეუძლებელია. ძალიან ბევრი გვაქვს ამაზე ნასაუბრები, თუმცა სხვა რეკომენდაციები, რა თქმა უნდა, ზედმიწევნით შესრულდება. შემდეგ რა გადაწყვეტილება იქნება მიღებული, ეს ჩვენზე არაა დამოკიდებული. არ გამოვრიცხავ, რომ ისევ პოლიტიკური გადაწყვეტილება მიიღონ და არ მოგვანიჭონ სტატუსი. არც ამას გამოვრიცხავ დღევანდელი რეალობიდან გამომდინარე, იმ გადაწყვეტილებებიდან გამომდინარე, რაც მაშინ მიიღეს - როდესაც უკრაინას და მოლდოვას [სტატუსი] მისცეს და არანაირი ახსნა-განმარტება არ ჰქონიათ რატომ არ მისცეს [სტატუსი] საქართველოს. დაჩაგრეს, ეს იყო პოლიტიკური გადაწყვეტილება“, - განაცხადა კალაძემ.
სარეკლამო ადგილი - 11 650 x 60 |