რატი იონათამიშვილი სტრასბურგის სასამართლოს გადაწყვეტილებას გამოეხმაურა, რომელმაც ნიკა გვარამიას საქმე წარმოებაში არ მიიღო. ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ აღნიშნა, რომ ადამიანებმა, რომლებიც ამ საქმესთან დაკავშირებით დეზინფორმაციულ კამპანიას აწარმოებდნენ, ქართულ სასამართლოს ბოდიში უნდა მოუხადონ.
„ველოდები როდის მოითხოვს კოლექტიური „ნაცმოძრაობა“ სტრასბურგის სასამართლოს მოსამართლეების ვეტინგსა და შემოწმებას კეთილსინდისიერებაზე. რამდენჯერ უნდა შეარცხვინოს ევროპულმა სასამართლომ ეს ადამიანები? ფაქტია, რომ სწორედ გვარამიას საქმე იყო, რომელზეც ეს ადამიანები დეზინფორმაციის მასშტაბურ კამპანიას აწარმოებდნენ ჩვენი სასამართლოსა და სახელმწიფოს წინააღმდეგ, რომ გვარამია იყო პოლიტპატიმარი და ამისთვის მოსამართლეების სანქცირებასაც კი მოითხოვდნენ. აღმოჩნდა, რომ იმდენად მართალი იყო ქართული სასამართლოები, რომ სტრასბურგმა წარმოებაშიც კი არ მიიღო ეს საქმე. ეს კიდევ ერთხელ აჩვენებს თუ რამდენად ხელოვნურად არის მოხვეული ეს ვეტინგის კამპანია სინამდვილეში, მაგრამ მე ვფიქრობ, რომ ამ ადამიანებმა უნდა აიღონ პასუხისმგებლობა, აღიარონ ეს ყველაფერი და ბოდიში მოუხადონ ჩვენს სასამართლოს“, - განაცხადა იონათამიშვილმა.
ნიკა გვარამიამ სტრასბურგის სასამართლოში პატიმრობის შეფარდება გაასაჩივრა, თუმცა საქართველოს უზენაესი სასამართლოს მსგავსად, სტრასბურგის სასამართლომ სარჩელი განსახილველადაც არ მიიღო.
| სარეკლამო ადგილი - 11 650 x 60 |
