41
28 მარტი 2024, 14:41
პარლამენტის ევროპასთან ინტეგრაციის კომიტეტის თავმჯდომარე მაკა ბოჭორიშვილი სტრასბურგის სასამართლოს მიერ ნიკა გვარამიას საქმეზე გამოტანილ განაჩენს გამოეხმაურა.
„ვნახეთ, რომ თურმე, ქართული მართლმსაჯულება ყოფილა მართალი; თურმე, ქართულ მართლმსაჯულებას აბსოლუტურად სწორად უმოქმედია. ნამდვილად, შემდეგ ხდება ხოლმე ეს სპეკულაციების საფუძველი, რომ თითქოს, საქართველოში არ არის ისე, როგორც უნდა იყოს.
ვფიქრობ, ის ადამიანები, ვინც ქმნიან აღქმას საქართველოს მართლმსაჯულებასთან დაკავშირებით, პრობლემას და საფრთხეს უქმნიან ზოგადად, ქვეყნის იმიჯს, რაც შემდეგ უკავშირდება იმ მნიშვნელოვან საკითხებს, თუნდაც, როგორიც არის ევროკავშირში ინტეგრაცია, აჩენენ კითხვებს მართლმსაჯულებასთან დაკავშირებით. ამის არანაირი საფუძველი არ არის. იცით, რომ მართლმსაჯულება საქართველოს ევროკავშირში ინტეგრაციის ერთ-ერთი უმნიშვნელოვანესი საკითხია“, - აღნიშნა ბოჭორიშვილმა.
სტრასბურგის სასამართლომ ნიკა გვარამიას სარჩელი განსახილველად არ მიიღო. გვარამიას თბილისის საქალაქო სასამართლომ 3 წლითა და 6 თვით პატიმრობა 2022 წლის 16 მაისს შეუფარდა. 2 ნოემბერს კი თბილისის სააპელაციო სასამართლომ ის პატიმრობაში დატოვა. ნიკა გვარამია სტრასბურგის სასამართლოში სწორედ ამ საქმეს ასაჩივრებდა.
| სარეკლამო ადგილი - 11 650 x 60 |
