74
23 თებერვალი 2024, 17:03
„ვერც „ხალხის ძალას“, ვერც ირაკლი კობახიძეს თუ ირაკლი ღარიბაშვილს, ვერავინ დაადანაშაულებს მიკერძოებულ თუ ჩასაფრებულ მიდგომაში საკუთარი სტრატეგიული პარტნიორების მიმართ“, - ამის შესახებ „ხალხის ძალის“ წევრი, ანალიტიკოსი დავით ქართველიშვილი წერს.
დავით ქართველიშვილი აღნიშნავს, რომ აშშ- საქართველოს ურთიერთობებზე წინა ელჩმა უარყოფითი გავლენა იქონია, რაც მოქმედმა ელჩმა უნდა გაითვალისწინოს.
„დღეს გამძაფრებული სიცხადით ვლინდება, თუ რა მავნებლური და დესტრუქციული როლი ითამაშა კელი დეგნანმა აშშ-საქართველოს ურთიერთობებში.
ნახევარი წლის განმავლობაში, რაც ქვეყანაში რობინ დანიგანი ჩამოვიდა, ერთი შემობრუნებული სიტყვა ან განცხადება არ უკადრებია ვინმეს მის მიმართ, მოქმედ ხელისუფლებასთან ობიექტური (ჯერჯერობით) და კონსტრუქციული დამოკიდებულების გამო. არც ერთი პასუხისმგებლობის მქონე ადამიანი არანაირად არ არის დაინტერესებული ვითარების ხელოვნურად დაძაბვასა ან რეალობის გაუკუღმართებაში.
ღმერთმა ქნას, პრაგმატულმა და საპარტნიორო ხაზმა ჩვენი ქვეყნების ურთიერთობაში ჩაანაცვლოს კელი დეგნანის ხელმძღვანელობით, უახლოეს წარსულში მიმდინარე ადგილობრივ ლაქია-მარიონეტებზე დადებული მცდარი და სახიფათო იდეოლოგიური ფსონი, რომელსაც პოლიტიკასთან არანაირი კავშირი არ გააჩნია.
„ხალხის ძალას“ ქვეყნის უსაფრთხოების, საბაზისო ღირებულებების დაცვის პულსზე თავისი ყურადღების მოდუნება არც წარსულში მოუხდენია და არც მომავალში არ აპირებს. მაგრამ ვერც „ბნელ ოთახში არარსებული შავი კატის“ აკვიატებულ ძებნაში დაადანაშაულებს მას ვინმე. საქართველოს მისამართით ხელის გაშვერის ნაცვლად (თუ რატომ გვაქვს სხვა პარტნიორებთან უფრო მჭიდრო ურთიერთობები), აშშ-მა, მათ შორის, საკუთარი თავის მიმართ საჭირო შეკითხვების დასმა უნდა დაიწყოს, რაშიც მას და ელჩ რობინ დანიგანს გულწრფელად მინდა ვუსურვო წარმატება“, - წერს დავით ქართველიშვილი.
| სარეკლამო ადგილი - 11 650 x 60 |
