თამარ იოსელიანი - ფოთის ახალი ნავსადგური დაასაქმებს 200-მდე ადამიანს
სარეკლამო ადგილი - 10
650 x 60
324 30 იანვარი 2022, 11:18

საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტოს ხელმძღვანელის, თამარ იოსელიანის განცხადებით, ფოთის ახალი საზღვაო ნავსადგური, რომელიც 29 იანვარს ოფიციალურად გაიხსნა, უმნიშვნელოვანესია ჩვენი კორიდორისთვის, რადგან შესაძლებელს გახდის ტვირთების გადმომისამართებას ჩვენს დერეფანში და გაზრდის სანავსადგურე ინფრასტრუქტურის სიმძლავრეებს.

„ახალი ნავსადგური დამატებით დაასაქმებს 200-მდე ადამიანს, შესაბამისად, ჩვენ ფოთის საზღვაო-სასწავლო ცენტრში ვმუშაობთ ახალი კურსების გახსნაზე, რომელიც ახლად გაჩენილ გამოწვევებს უპასუხებს საპორტე სექტორში”, – აღნიშნა საზღვაო ტრანსპორტის სააგენტოს ხელმძღვანელმა. 

ეკონომიკის სამინისტროს ინფორმაციით, ფოთის ახალი ნავსადგური საქართველოს საზღვაო სექტორში მიმდინარე პროექტებს შორის აქამდე რეალიზებული ერთ-ერთი ყველაზე მასშტაბურია და მისი ღირებულება 120 მილიონ დოლარს აღწევს.

„აღსანიშნავია, რომ აშშ-ს საერთაშორისო განვითარების ფინანსურმა კორპორაციამ (DFC) ნავსადგურის მშენებლობის პროექტი 50 მილიონი აშშ დოლარით დააფინანსა, რაც ამ ორგანიზაციის მიერ ერთ პროექტზე გამოყოფილი ყველაზე დიდი ინვესტიციაა რეგიონში.

ნავსადგურის მშენებლობის ფარგლებში განხორციელდა 93 მილიონი აშშ დოლარის ინვესტიცია, აშენდა მასშტაბური ჰიდროტექნიკური ნაგებობები და მოეწყო თანამედროვე საპორტე ინფრასტრუქტურა.

პროექტის შემდგომი გაფართოება, რომლის ღირებულება 30 მილიონ აშშ დოლარს შეადგენს, დამატებით 230 მეტრი სიგრძის ღრმაწყლოვანი (13მ) ნავმისადგომის მშენებლობას ითვალისწინებს. ნავმისადგომი და ახალი ნავსადგურის ინფრასტრუქტურა საშუალებას იძლევა, მოემსახუროს მსხვილტონაჟიან გემებს, რომელთა ტვირთამწეობა 50 000 ტონამდეა“,- აღნიშნულია ეკონომიკის სამინისტროს ინფორმაციაში.

„პროექტის სრულად დასრულების შემდეგ საქართველოს ერთიანი   სანავსადგურე  ინფრასტრუქტურის გამტარუნარიანობა 3.5 მილიონი ტონით გაიზრდება”, – განაცხადა თამარ იოსელიანმა.

სარეკლამო ადგილი - 11
650 x 60
არქივი