მიმდინარე თვის ბოლოს გაირკვევა, მიუახლოვდება თუ არა ქვეყანა მრავალსაუკუნოვან მიზანს - გახდეს ევროპული ოჯახის სრულფასოვანი წევრი. ევროკომისიის დადებითი დასკვნის მოლოდინშია სახელისუფლებო გუნდი. „ქართულ ოცნებაში“ ოპონენტების მიზნებზეც საუბრობენ. როგორც მმართველი პარტიის წევრმა, გურამ მაჭარაშვილმა განაცხადა, ოპოზიცია ცდილობს, სტატუსის მიღების შემთხვევაში, ეს დაიბრალონ და ნეგატიური გადაწყვეტილება თუ იქნება, ხელისუფლებას დაბრალდეს.
„შესაძლებლობა არის, გვაქვს იმედი, რომ ჩვენ კანდიდატის სტატუსს მივიღებთ და უნდათ, რომ თუკი ამ გადაწყვეტილებას მიიღებენ, თვითონ მიიწერონ და თქვან, რომ ეს არის მათი დამსახურება და თუკი თეორიულად შეიძლება საქართველოს უარი ეთქვას სტატუსის მიღებასთან დაკავშირებით, მაშინ იტყვიან, რომ ეს ხელისუფლების ბრალია“, - განაცხადა მაჭარაშვილმა.
რამდენიმე დღეში ევროკომისიის შეფასება ცნობილი გახდება. თვის ბოლომდე კი, ევროპელმა ლიდერებმა კანდიდატი ქვეყნის სტატუსის მინიჭებაზე გადაწყვეტილება უნდა მიიღონ. საქართველოს ხელისუფლებას სამართლიანი გადაწყვეტილების იმედი აქვს - ამბობენ რომ, ქვეყანა ყველა კრიტერიუმს აკმაყოფილებს.
| სარეკლამო ადგილი - 11 650 x 60 |
