განათლების, მეცნიერებისა და ახალგაზრდულ საქმეთა კომიტეტის თავმჯდომარე, გივი მიქანაძე სომხეთის ეროვნული ასამბლეის ვიცე-სპიკერს შეხვდა, - ამის შესახებ ინფორმაციას საქართველოს პარლამენტის პრესსამსახური ავრცელებს.
მათივე ცნობით, სომხეთის ეროვნული ასამბლეის ვიცე-სპიკერმა ქართულ მხარეს ევროკავშირის კანდიდატი ქვეყნის სტატუსის მიღება და ეროვნული ნაკრების ევროპის ჩემპიონატზე გასვლა მიულოცა.
„საქართველოს დელეგაცია განათლების, მეცნიერებისა და ახალგაზრდულ საქმეთა კომიტეტის თავმჯდომარის გივი მიქანაძის ხელმძღვანელობით, სომხეთში შეხვედრებს აგრძელებს.
გივი მიქანაძე და დელეგაციის წევრები სომხეთის რესპუბლიკის ეროვნული ასამბლეის ვიცე-სპიკერს და საქართველოს პარლამენტთან მეგობრობის ჯგუფის ხელმძღვანელს რუბენ რუბინიანს შეხვდნენ.
შეხვედრაზე საქართველო-სომხეთს შორის მეგობრული და პარტნიორული ურთიერთობები მიმოიხილეს. მხარეებმა საპარლამენტთაშორისო ურთიერთობების გაღრმავებაზე, მეგობრობის ჯგუფებსა და დარგობრივ კომიტეტებს შორის კავშირებისა და თანამშრომლობის გაძლიერების მნიშვნელობაზე ისაუბრეს. განსაკუთრებული ყურადღება გამახვილდა განათლებისა და მეცნიერების მიმართულებით თანამშრომლობაზე.
სომხეთის ეროვნული ასამბლეის ვიცე-სპიკერმა ქართულ მხარეს ევროკავშირის კანდიდატი ქვეყნის სტატუსის მიღება და ეროვნული ნაკრების ევროპის ჩემპიონატზე გასვლა მიულოცა.
საქართველოს პარლამენტის დელეგაციის შემადგენლობაში არიან: განათლების, მეცნიერებისა და ახალგაზრდულ საქმეთა კომიტეტის თავმჯდომარე გივი მიქანაძე და კომიტეტის წევრები: ვლადიმერ კახაძე და ვახტანგ მეგრელიშვილი.
შეხვედრას ასევე ესწრებოდა სომხეთის რესპუბლიკაში საქართველოს საგანგებო და სრულუფლებიანი ელჩი გიორგი შარვაშიძე“,- აღნიშნულია გავრცელებულ ინფორმაციაში.
| სარეკლამო ადგილი - 11 650 x 60 |
