ჩვენი ამომრჩეველი აბსოლუტურად არის ევროპელი, რომელსაც არანაირად არ უნდა ცალ ფეხზე დგომა, რომლისთვისაც ევროპა არის სტანდარტი ეკონომიკური განვითარების, სოციალური პროგრამების, განათლების და დემოკრატიული მართვის, - ამის შესახებ პარლამენტის ვიცე-სპიკერმა გიორგი ვოლსკიმ „დღის ქრონიკაში“ განაცხადა.
„დავფიქრდეთ ფაქტზე - ჩვენი მოსახლეობის 85% თუ მეტი არა, ევროინტეგრაციას უჭერს მხარს. ვინ შეიტანა კონსტიტუციაში [საქართველოს ევროატლანტიკური მისწრაფებები] და მიიღეს თუ არა კონსტიტუციის განხილვაში მონაწილეობა დღევანდელმა მყვირალა ოპონენტებმა? -არა. 85% და ცოტა მეტი თუ უჭერს მხარს, ამავე დროს „ქართული ოცნება“ 9 არჩევნებში თუ იმარჯვებს, ელემენტარული არითმეტიკა არ არის ის, რომ დაითვალო ამ 85%-დან რამდენია „ქართული ოცნების“ მხარდამჭერი, ანუ ჩვენი ამომრჩეველი აბსოლუტურად არის ევროპელი, რომელსაც არანაირად არ უნდა ცალ ფეხზე დგომა, რომლისთვისაც ევროპა არის სტანდარტი ეკონომიკური განვითარების, სოციალური პროგრამების, განათლების და დემოკრატიული მართვის. ჩვენ კონსტიტუციაში მხოლოდ ჩანაწერი არ გაგვიკეთებია, იმის იქით იყო უზარმაზარი მუშაობა, რომელიც ჩატარდა თუნდაც კანონმდებლობის სინქრონიზაციის თვალსაზრისით. ზუსტად ის სტანდარტი დაინერგა, რომლითაც არაერთ საერთაშორისო კვლევაში და რეიტინგებში გადავუსწარით ევროკავშირის არაერთ ქვეყანას“, - განაცხადა ვოლსკიმ.
სარეკლამო ადგილი - 11 650 x 60 |